Aupa Xabi

Galdera garrantzitsua egiten duzula iruditzen zait. Ez dut baloratuko turismoaren egoeraren erantzuleak nortzuk izan gaitezkeen eta zergatik, hala ere, bai esan nahiko nuke gobernu ardurak izan ditugunok -eta oraingoan dituztenek ere- ukatu ezineko ardura dugula guzti honetan.

Gure helburua herriko sektore ekonomiko ezberdinen arteko oreka lortzea da, krisi sektorialen aurrean herriko ekonomiak erantzuten jarraitu ahal izan dezan.

Turismoa Zarauzko sektore garrantzitsu bat da, baina ongi aipatzen duzun moduan, buelta sakon bat behar du. Aurreko legegintzaldian Turismo eredu berri bat diseinatzeko, alor hori dinamizatzeko eta garatzeko plan orokorra osatzen hasi ginen eta plangintza horretako bi oinarri nagusi azpimarratuko nituzke:

• Batetik, turismoari lotutako jarduerak uda garaira ez mugatzeko eta turismo potentziala hobetzeko komunikazio eta dinamizazio lana.
• Bestetik, tokian tokiko turismoa kudeatzeko eredua, herritarren zein turismoko eragileen laguntzarekin landu.

Horren helburua, Zarauzko ezaugarri orokorrak kontuan izanda, herriaren neurriko eskaintza turistikoa osatzea izan behar du, eta horren garapenean lanean diharduten agente guztien parte hartzea beharrezkoa da.

Besterik gaber, mila esker zure galderarengatik.